Surxondaryoda 4 nafar o‘smirning bedarak yo‘qolgani ma’lum qilindi
Termiz, Qumqo‘rg‘on, Jarqo‘rg‘on va Muzrobod tumanlarida o'smirlar uylaridan chiqib ketib qaytib kelmagan.
Surxondaryo viloyatida bir necha nafar yosh fuqarolarning bedarak yo‘qolgani bo‘yicha ichki ishlar organlari tomonidan qidiruv ishlari olib borilmoqda.
2006-yilda tug‘ilgan, Termiz shahri Shifokor mahallasida yashovchi Xasanova Dilshoda Yusuf qizi 2025-yil 28-avgust kuni yashash manzilidan noma’lum tomonga chiqib ketgan va hozirgacha qaytib kelmagan.
2007-yilda tug‘ilgan, Qumqo‘rg‘on tumani “Jaloyir” mahallasida yashovchi Mamadaminova Jasmina Turdimurod qizi ham 28-avgust kuni uyidan chiqib ketib, hozirda uning qayerdaligi noma’lum.
2005-yilda tug‘ilgan, Jarqo‘rg‘on tumani “Qorayantoq” mahallasida yashovchi Eshmo‘minov Asadbek Eshmurod o‘g‘li esa 7-avgust kuni yashash manzilidan chiqib ketgan va qaytmagan.
Shuningdek, 15 yoshli, Muzrobod tumani “Oriyot” mahallasida yashovchi Ro‘zimurodova Jasmina 24-avgust kuni uyidan chiqqanidan so‘ng bedarak yo‘qolgan.
Huquq-tartibot idoralari fuqarolardan ushbu shaxslar haqida biror ma’lumotga ega bo‘lsa, darhol “102” qisqa raqamiga yoki ichki ishlar organlarining hududiy bo‘linmalariga murojaat qilishni so‘raydi.
Qidiruvda yordam bergan fuqarolar 2 million so‘mgacha pul mukofoti bilan taqdirlanadi. Shuningdek, ma’lumot taqdim etgan shaxslarning shaxsiy ma’lumotlari maxfiy saqlanishi kafolatlanadi.
