Toshkentda tadbirkor va olimlar bilan ochiq muloqot o‘tkazildi
Muloqotda xalqaro moliya institutlari, ilmiy markazlar, xalqaro tashkilotlar hamda 240 nafar mutaxassis qatnashdi.
Toshkent irrigatsiya va qishloq xo‘jaligini mexanizatsiyalashtirish muhandislari universitetida suv xo‘jaligi sohasidagi tadbirkorlar bilan ilmiy va oliy ta’lim muassasalarining ilmiy xodimlari tomonidan yaratilgan ilmiy ishlanmalar va ixtirolarni ishlab chiqarishga joriy etish bo‘yicha ochiq muloqot (uchrashuv) o‘tkazilmoqda.
Ushbu tadbir Davlatimiz Rahbarining joriy yilning 20-avgust kuni tadbirkorlar bilan o‘tkazilgan V ochiq muloqoti davomida berilgan topshiriqlar ijrosini ta’minlash maqsadida tashkil etilgan.
Ochiq muloqotda Oliy ta’lim va ilmiy-tadqiqot muassasalari, xalqaro moliya tashkilotlari va suv tejovchi sug‘orish tizimlari va butlovchi qismlarni ishlab chiqaruvchi va quruvchi korxonalar hamda suv xo‘jaligi tashkilotlaridan jami 240 nafar mutaxassislar ishtirok etmoqda.
Shuningdek, tadbirda xalqaro suv resurslarini boshqarish instituti (IWMI), Orolni qutqarish xalqaro jamg‘armasi, Markaziy Osiyo davlatlararo suv xo‘jaligini muvofiqlashtirish komissiyasining Ilmiy-axborot markazi, BMT taraqqiyot dasturi (UNDP), Germaniya Xalqaro hamkorlik jamiyati (GIZ), Koreya xalqaro hamkorlik agentligi vakolatxonasi (KOICA) va boshqa xalqaro muassasalar vakillari ham qatnashmoqda.
Ochiq muloqot doirasida oliy ta’lim va ilmiy tashkilotlar ilmiy xodimlari tomonidan yaratilgan ishlanmalari namoyishi o‘tkazilmoqda.
Jumladan, Toshkent irrigatsiya universiteti 50 ta, Irrigatsiya va suv muammolari ilmiy-tadqiqot institutidan 20 ta, "SUVMASH" AJ 10 ta, suv tejovchi sug‘orish tizimlari va butlovchi qismlarini ishlab chiqaruvchi va quruvchi korxonalar 50 ta hamda boshqa muassasalar 50 ta ishlanmalarini ko‘rgazmaga olib kelgan.
