Buddaviylar ibodatxonasi, sayyidlar qabristoni va qadimiy chillaxona: Termizning diqqatga sazovor 5 ta lokatsiyasi
Agar dam olish kunlari qayerga sayohat qilishni o‘ylayotgan bo‘lsangiz, Termizning mashhur 5 ta nuqtasini tavsiya qilamiz.
O‘zbekiston Mustaqilligining 34 yilligi munosabati bilan 5 kunlik ish haftasida ishlovchilar uchun 30 avgustdan 1-sentyabrgacha dam olish kunlari eʼlon qilindi.
Ushbu dam olish kunlarini qayerda mazmunli vaqt o‘tkazish mumkin? Agar siz tarixiy yodgorliklar va ziyoratgohlarni ko‘rishga qiziqsangiz, Surxondaryo viloyati aynan siz uchun ajoyib tanlov bo‘ladi.
Maʼlumki, Surxondaryo viloyati tog‘ va ekoturizm bilan ajralib turadi. Mintaqada tabiiy landshaftning ajoyib go‘zalligini namoyon qiladigan g‘orlar, massivlar va daralarni ko‘rish mumkin.
Termiz shahriga tashrif buyurmoqchi bo‘lsangiz, albatta ko‘rishingiz kerak bo‘lgan Beshta diqqatga sazovor manzilni tavsiya qilamiz:
1. Qirqqiz qalʼasi
Termiz shahrida joylashgan bu qadimiy inshoot IX–X asrlarda qurilgan. Hozirda uning faqat xarobalari saqlanib qolgan bo‘lsada, ming yillardan keyin ham qalʼa o‘zining tarixiy ulug‘vorligini eslatib turadi. Tarixchilar bu bino dastlab zodagonlar saroyi, xonaqoh yoki karvonsaroy bo‘lgan, deb taxmin qilsada, ko‘pchilik u Ko‘hna Termizning mudofaa qalʼasi sifatida xizmat qilgan, degan fikrda.
2. Sulton Saodat majmuasi
Sulton Saodat — Termiz sayyidlari dafn etilgan muqaddas majmua. IX asrda shakllangan Termiz sayyidlari sulolasi bu hududning rivojiga katta hissa qo‘shgan. XII asrda qurilgan asosiy maqbaralar yoniga XV–XVII asrlarda yangi inshootlar qo‘shilgan. Uzun hovli ikki tomonida joylashgan gumbazli zallar ushbu majmuaga alohida go‘zallik bag‘ishlaydi.
3. Hakim At-Termiziy majmuasi
Musulmonlar uchun muqaddas ziyoratgoh sanaladigan bu majmua Eski Termizning chekkasida joylashgan. Bu yerda buyuk islom allomasi Abu Abdulloh ibn Hasan ibn Bashir al-Hakim At-Termiziy — xalq orasida “Termiz otasi” nomi bilan mashhur zot dafn etilgan. Majmua hududida qadimiy chillaxonalar, Eski Termiz xarobalari va shahar muzeyi ham joylashgan bo‘lib, tarix va madaniyatni chuqurroq his etish imkonini beradi.
4. Jahon savdo bozori
Surxondaryodagi “Jahon bozori” O‘zbekiston va Afg‘oniston o‘rtasidagi savdo-iqtisodiy hamkorlikni mustahkamlash maqsadida tashkil etilgan yirik qo‘shma savdo hududidir. 120 gektarlik maydonga ega bo‘lgan bu bozor hududida 500 dan ortiq do‘kon faoliyat yuritadi. Afg‘onistonlik tadbirkorlar vizasiz tarzda 15 kungacha bozor hududida qolib, savdo-sotiq qilish imkoniyatiga ega. Ushbu bozor nafaqat ikki davlat o‘rtasidagi iqtisodiy aloqalarni rivojlantirish, balki hududning eksport salohiyatini oshirish uchun ham katta imkoniyat yaratmoqda.
5. Fayoztepa buddaviylar ibodatxonasi
Termiz yaqinidagi Fayoztepa qadimiy buddaviylik yodgorliklaridan biridir. U I–III asrlarda Kushon imperiyasi davrida qurilgan bo‘lib, Markaziy Osiyodagi eng muhim tarixiy-diniy meros obidalaridan hisoblanadi. Ibodatxonada o‘sha davrdagi diniy hayot, ibodatlar va madaniy marosimlarning izlarini his qilish mumkin.
Surxondaryoga sayohat qilib, tarix, tabiat va madaniyat uyg‘unligini bir vaqtning o‘zida his qilish imkoniyatiga ega bo‘lasiz. Bayram kunlarida bu maskan siz uchun unutilmas sayohat manziliga aylanishi shubhasiz.
