Jizzaxda ota farzandi uchun 125 mln aliment to'ladi
Ona esa pullarni bankka omonatga qo'ygan.
Farzandlarning huquqlarini ta’minlash va ularning kelajagini himoya qilish davlat siyosatining ustuvor yo‘nalishlaridan biridir. Shu maqsadda aliment to‘lovlari yuzasidan qarorlarning o‘z vaqtida ijro etilishi qat’iy nazorat ostida olib borilmoqda.
Zomin tumanida yashovchi fuqaro F.Q. sud qaroriga asosan voyaga yetmagan farzandi uchun sobiq turmush o‘rtog‘i K.Q.ga aliment to‘lashi lozim edi. Biroq u belgilangan majburiyatni o‘z vaqtida bajarmagani sababli qarzdorlik summasi 8 million so‘mgacha yetgan.
Majburiy ijro byurosi Zomin tuman bo‘limi davlat ijrochilari tomonidan ko‘rilgan choralar, shuningdek, tomonlarning o‘zaro kelishuvi natijasida aliment bo‘yicha oldindan to‘lovlar ham hisobga olinib, jami 125 million so‘m undirildi va bolaning onasiga topshirildi.
Farzandi kelajagini o‘ylagan ona ushbu mablag‘ni to‘liq bank omonatiga joylashtirishini bildirgan.
