Prezident Shavkat Mirziyoyev rasmiy tashrif bilan Xitoyga jo‘nab ketdi
Prezident 31 avgust - 1 sentyabr kunlari Shanxay hamkorlik tashkiloti Davlat rahbarlari kengashining navbatdagi majlisida ishtirok etadi.
O‘zbekiston Respublikasi Prezidenti Shavkat Mirziyoyev Xitoy Xalq Respublikasi Raisi Si Szinpinning taklifiga binoan 30 avgust kuni rasmiy tashrif bilan ushbu mamlakatga jo‘nab ketdi.
Tashrif dasturiga muvofiq, davlatimiz rahbari 31 avgust - 1 sentyabr kunlari Tyanszin shahrida Shanxay hamkorlik tashkiloti Davlat rahbarlari kengashining navbatdagi majlisi va "SHHT plyus" formatidagi uchrashuvda ishtirok etadi.
SHHT doirasidagi ko‘p qirrali hamkorlikni ustuvor yo‘nalishlarda yana-da rivojlantirish va tashkilot faoliyatini takomillashtirishning dolzarb masalalari muhokama qilinadi.
Tyanszin deklaratsiyasi, qo‘shma hujjat va qarorlar qabul qilinishi rejalashtirilgan.
O‘zbekiston yetakchisi 2 sentyabr kuni Pekin shahrida XXR Raisi Si Szinpin bilan muzokaralar, shuningdek, xorijiy delegatsiyalar rahbarlari va Xitoyning ishbilarmon doiralari vakillari bilan uchrashuvlar o‘tkazadi.
3 sentyabr kuni davlatimiz rahbari Ikkinchi jahon urushidagi G‘alabaning 80 yilligiga bag‘ishlangan tantanali tadbirlarda ishtirok etishi ko‘zda tutilgan.
