Qashqadaryoda 12 yoshli qiz boshiga temir tirgak tushib ketishi oqibatida halok bo'ldi
Xavfsizlik qoidalari buzilishi oqibatida qurilishi tugallanmagan ko‘p qavatli uyning yuqori qavatidan temir tirgak qulab tushgan.
Qashqadaryo viloyatining Qarshi shahrida 26-avgust kuni fojeali hodisa yuz berdi. “Oqtepa” mahallasidagi qurilishi tugallanmagan ko‘p qavatli turar joy majmuasidan temir tirgak qulab tushib, “Orzu” bozori hududida bo‘lgan 12 yoshli qizning boshiga tekkan. Qiz voqea joyida halok bo‘lgan. Bu haqda Zamon.uz ga Bosh prokuratura axborot xizmati xabar berdi.
Rasmiy ma’lumotga ko‘ra, “Sanoat Maxkom” MChJga qarashli qurilish maydonida mehnatni muhofaza qilish qoidalari buzilgan. Shu sababli binoning 10-qavatidan tushgan temir tirgak voyaga yetmagan M.U. ismli qizning boshiga tushgan.
Sud-tibbiy ekspertizasining dastlabki xulosasida qizning bosh miyasiga qon quyilishi, bosh suyagining parchalangan sinishlari, chap o‘mrov suyagining sinishi va o‘pkalariga qon ketishi oqibatida vafot etgani qayd etilgan.
Hodisa bo‘yicha sud kriminalistika va biologiya ekspertizalari tayinlandi, shuningdek, Qashqadaryo viloyati Bandlik boshqarmasidan mutaxassislar jalb etildi. Hozirda hodisa yuzasidan tergovga qadar tekshiruv ishlari olib borilmoqda.
