“Tashabbus budjeti”da yangi tartib: 50 foiz mablag‘ni aholi to‘lasa, loyiha avtomatik g‘olib bo‘ladi
“Tashabbus byudjeti” ishtirokchilari uchun yangi imkoniyatlar taqdim etildi.
2026-yildan boshlab “Tashabbus byudjeti” doirasida ijtimoiy loyihalarni moliyalashtirishda yangi tartib joriy etiladi. Yangi mexanizmga ko‘ra, agar tashabbuskorlar loyiha qiymatining yarmiga teng mablag‘ni o‘z hisobidan qoplasa, qolgan 50 foizi davlat tomonidan moliyalashtiriladi. Bunday tashabbuslar ovoz berish jarayonisiz g‘olib deb topiladi va darhol amalga oshiriladi.
Prezident qarorida qayd etilishicha, bu yangilik fuqarolar va davlat hamkorligida mahalliy muammolarni tezroq hal etishga xizmat qiladi.
Shuningdek, Oliy Majlis deputatlariga qo‘shimcha imkoniyatlar beriladi: ular yil davomida ovoz yig‘a olmagan ikki loyihani tanlab, har biriga 3,3 milliard so‘mgacha mablag‘ ajratilishi mumkin bo‘ladi. Ushbu tashabbuslar ham avtomatik ravishda g‘olib hisoblanadi.
Jarayonning shaffofligini ta’minlash maqsadida Ochiq byudjet portalida maxsus reestr va g‘olib loyihalar xaritasi yaratiladi.
