Toshkentda ota 3 farzandi uchun 150 ming dollar alimentni oldindan to‘ladi
Uchtepalik erkak farzandlari voyaga yetguniga qadar to‘lanadigan alimentni bir yo‘la to‘lab berdi.
Toshkent shahrining Uchtepa tumanida yashovchi erkak 3 nafar farzandi voyaga yetguniga qadar to‘lanishi lozim bo‘lgan aliment pullarini bir yo‘la to‘ladi. Majburiy ijro byurosi (MIB) Toshkent shahar boshqarmasining ma’lum qilishicha, to‘lov miqdori qariyb 150 ming AQSH dollarini tashkil etgan.
Ma’lumotlarga ko‘ra, sud qaroriga binoan, erkak har oy ish haqi va boshqa daromadlarining uchdan bir qismini aliment sifatida to‘lab borishi kerak edi. Biroq u ijro bo‘limiga murojaat qilib, farzandlarining voyaga yetishiga qadar to‘lanadigan jami summani hisoblab berishni so‘ragan.
Hisob-kitoblarga ko‘ra, 2025 yil 1 iyuldan 2040 yil 2 fevralga qadar to‘lanishi lozim bo‘lgan umumiy aliment miqdori 1 milliard 847 million 413 ming so‘mni tashkil etgan. 29-avgust kuni ota ushbu mablag‘ni 150 000 AQSH dollari ko‘rinishida bir yo‘la to‘lab, ijro ishini yakunladi.
Eslatib o‘tamiz, bundan avval Uchtepa tumanida yana bir ota 2,4 milliard so‘mlik alimentni oldindan to‘lagani xabar qilingan edi. Shuningdek, Nukus shahrida bir fuqaro farzandi uchun 2,2 milliard so‘mlik alimentni bir kunda to‘lab, rekord o‘rnatgan edi.
