O‘zbekistonda 290 mingga yaqin kishi huquqbuzarlik sodir etishga moyil shaxs sifatida hisobga olingan
Vafot etgan yoki uzoq muddatga xorijga chiqib ketganlar muntazam ravishda ro‘yxatdan chiqarib boriladi.
O‘zbekistonda 290 mingga yaqin fuqaro huquqbuzarlik sodir etishga moyil shaxslar sifatida profilaktik ro‘yxatga olingan. Bu haqda 27-avgust kuni bo‘lib o‘tgan matbuot anjumanida IIV Huquqbuzarliklar profilaktikasi xizmati boshlig‘i o‘rinbosari Rahimjon Naimov ma’lum qildi. Unga ko‘ra, tuzalish yo‘liga kirgan, vafot etgan yoki uzoq muddatga xorijga chiqib ketganlar muntazam ravishda ro‘yxatdan chiqarib boriladi.
Amaldagi qonunchilikka ko‘ra, ilgari sudlangan shaxslar, ayrim ma’muriy huquqbuzarliklarni sodir etganlar, maxsus tarbiyaviy muassasalardan qaytganlar yoki jinoyat ishlari tugatilgan, ammo reabilitatsiya qilinmagan shaxslar hisobga olinadi. Shu bilan birga, “Huquqbuzarliklar profilaktikasi to‘g‘risida”gi qonunga o‘zgartirishlar kiritilishi rejalashtirilmoqda. Yangi loyiha qabul qilinsa, hisob toifalari 4 ta guruhgacha qisqartiriladi va ro‘yxatdagi shaxslar soni qariyb 60 foizga kamayadi.
IIV vakilining aytishicha, ushbu ro‘yxat huquqbuzarlik ehtimoli yuqori bo‘lgan fuqarolarga yuridik, psixologik, pedagogik va ijtimoiy yordam ko‘rsatishga qaratilgan. “Bu ro‘yxat ularning huquqlarini cheklamaydi. Aksincha, muammolarini o‘rganib, mahalliy mutasaddilar bilan birgalikda ijtimoiy moslashuv dasturlari ishlab chiqiladi”, — dedi vazirlik rasmiysi.
