1-sentabrdan Moskvada mehnat muhojirlarini ro‘yxatga olishning yangi tartibi kuchga kirdi
Tajriba loyihasi O‘zbekiston va yana 8 davlat fuqarolariga majburiy hisoblanadi.
Moskva va Moskva viloyatida 2025-yil 1-sentabrdan boshlab xorijiy fuqarolarning migratsiya hisobini yuritish bo‘yicha yangi tajriba loyihasi start oldi. Bu haqda Moskva ko‘p funksiyali migratsiya markazi (MMK) ma’lum qildi.
Mazkur tajriba doirasida O‘zbekiston, Tojikiston, Qirg‘iziston, Armaniston, Qozog‘iston, Gruziya, Ozarbayjon, Moldova va Ukraina fuqarolari uchun “Amina” mobil ilovasidan foydalanish majburiy etib belgilanmoqda. Ilova xorijiy fuqarolarning yashash joyi va uning o‘zgarishi haqida ichki ishlar organlariga masofadan turib ma’lumot berish imkonini beradi.
Ro‘yxatdan o‘tish uchun xorijiy fuqaro shaxsiy telefoniga “Amina” ilovasini o‘rnatishi lozim. Avtorizatsiya xorijiy fuqarolik kartasi yordamida amalga oshiriladi, mazkur hujjat yo‘qolgan taqdirda esa pasport ma’lumotlari orqali kirish mumkin bo‘ladi.
Ilova geolokatsiya ma’lumotlarini Rossiya Ichki ishlar vazirligiga uzatadi. Agar uch ish kuni davomida tizimda harakat qayd etilmasa, fuqaro migratsiya markazi reestridan chiqariladi. Monitoring qoidalarini buzgan shaxslar esa “Kuzatuvdagi shaxslar reestri”ga kiritilishi mumkin.
MMK ma’lumotiga ko‘ra, tajriba loyihasi amaldagi migratsiya hisobini yuritish tartibiga alternativ sifatida sinov tariqasida joriy qilinmoqda.
