Bugundan AI-80 benzinini sotish to‘xtatildi
Ichki bozor bosqichma-bosqich AI-92 benziniga o‘tkazilmoqda.
O‘zbekistonda 2025-yil 2-sentabrdan boshlab AI-80 rusumidagi benzin savdosi to‘liq to‘xtatildi. Bu qaror davlat rahbarining “O‘zbekiston – 2030” strategiyasini amalga oshirish doirasida, atrof-muhitni asrash va “yashil iqtisodiyot”ga o‘tish maqsadida qabul qilingan Farmoniga muvofiq amalga oshirildi.
“O‘zbekneftgaz” AJ ma’lumotiga ko‘ra, endilikda birja savdolariga faqat yuqori oktanli AI-92 markali benzin chiqariladi. Shu bilan birga, AI-92 benzinining hajmi sezilarli darajada oshirilgan. Ilgari 1000 tonna miqdorida taklif etilgan bo‘lsa, bugungi kunda bu raqam 1720 tonnaga yetkazilgan. Mutasaddilar ichki bozor talabidan kelib chiqib, kelgusida bu hajmni yanada oshirish imkoniyati mavjudligini ta’kidlamoqda.
Avgust oyida tadbirkorlar tomonidan xarid qilingan AI-80 benzini esa belgilangan majburiyatlar va mavjud qoldiqlar doirasida sentyabr oyida egalariga yetkazib berilishi davom ettiriladi.
Mutaxassislarning qayd etishicha, AI-92 benzinining keng joriy etilishi avtomobillar uchun yanada sifatli va ekologik toza yoqilg‘i bilan ta’minlashga xizmat qiladi hamda mamlakatda ekologik barqarorlikni ta’minlashda muhim qadam bo‘ladi.
