Parlament nazorati ostida tashabbusli byudjet tizimi kengaytiriladi
2026-yildan boshlab har bir deputat saylov okrugida g‘olib chiqmagan ikki loyihani tanlab, ularni byudjet mablag‘lari hisobidan amalga oshirish imkoniyatiga ega bo‘ladi.
O‘zbekiston Respublikasi Prezidentining “Tashabbusli byudjet jarayonlarini takomillashtirish doirasida xalq vakillari va saylovchilar o‘rtasida hamkorlikni kuchaytirish chora-tadbirlari to‘g‘risida”gi PQ–264-son qarori 2025-yil 29-avgust kuni qabul qilindi.
Mazkur qarorga muvofiq, Oliy Majlis Qonunchilik palatasida tashabbusli byudjet jarayonlarini muvofiqlashtirish, loyihalarning amalga oshirilishini nazorat qilish maqsadida 11 nafar deputatdan iborat parlament komissiyasi tuziladi.
2026-yil 1-yanvardan boshlab deputatlar o‘z saylov okruglarida tashabbusli byudjetda g‘olib chiqmagan loyihalar ichidan aholi turmush tarziga ijobiy ta’sir ko‘rsatadigan hamda hududlarni rivojlantirishga xizmat qiladigan ikkita loyihani (har mavsumda bittadan) tanlash imkoniga ega bo‘ladi. Ushbu tanlov “Ochiq byudjet” axborot portali orqali amalga oshiriladi.
Tanlab olingan loyihalar respublika byudjeti mablag‘lari hisobidan moliyalashtiriladi. Shu bilan birga, deputatlar tashabbusli byudjetda g‘olib bo‘lmagan loyihalarni qo‘llab-quvvatlash uchun har yili ikki mavsumda BHMning 8 ming baravari miqdorida mablag‘ ajratilishi nazarda tutiladi.
2026-yil 1-fevraldan esa tashabbusli byudjet jarayonlarida aholi va davlat o‘rtasida sheriklik asosida loyihalarni moliyalashtirish mexanizmi joriy etiladi. Bunga ko‘ra, agar loyihaning 50 foizi tashabbuskor fuqarolar tomonidan ixtiyoriy mablag‘ hisobidan ta’minlansa, qolgan qismi respublika byudjetidan moliyalashtiriladi.
