Pekinda O‘zbekiston Turizm ofisi ochildi

2025-yil 1-sentabr kuni Xitoy Xalq Respublikasining poytaxti Pekin shahrida O‘zbekiston Turizm ofisi o‘z faoliyatini boshladi. Ushbu muhim tadbir oliy darajadagi rasmiy tashrif doirasida o‘tkazilib, O‘zbekiston va Xitoy o‘rtasidagi do‘stona munosabatlar, strategik hamkorlik va o‘zaro ishonchning yaqqol ifodasi bo‘ldi.

 

Ochilish marosimida Turizm qo‘mitasi raisi Umid Shadiyev, Pekin tashqi madaniy savdo assotsiatsiyasi ijrochi direktori Chi Lu xonim, shuningdek, Xitoyning yetakchi turistik kompaniyalari vakillari ishtirok etishdi. Tadbir davomida so‘zga chiqqanlar yangi ofis ikki davlat o‘rtasidagi turizm aloqalarini rivojlantirishda muhim platformaga aylanishini ta’kidladilar. Shuningdek, u Xitoy kompaniyalariga O‘zbekiston turizm bozoriga kirishda ko‘maklashib, xorijiy investorlar uchun keng imkoniyatlar ochishi qayd etildi.

 

So‘nggi yillarda ikki davlat o‘rtasidagi hamkorlik jadal rivojlanib bormoqda. 2025-yil 1-iyundan kuchga kirgan 30 kunlik vizasiz rejim, haftasiga 50 dan ortiq aviaqatnovlarning yo‘lga qo‘yilgani bunga yaqqol misoldir. Yaqin yillarda bu ko‘rsatkichni 100 reysgacha oshirish rejalashtirilgan. Bundan tashqari, 2025-yil “Xitoyda O‘zbekiston turizm yili” sifatida e’lon qilinib, mamlakatimiz delegatsiyalari Xitoyning yirik shaharlarida targ‘ibot tadbirlarini faol o‘tkazib kelmoqda.

 

O‘zbekiston 2030-yilga borib Xitoydan mamlakatimizga tashrif buyuruvchi sayyohlar sonini 3 million nafarga yetkazishni maqsad qilgan. Pekinda ochilgan Turizm ofisi ushbu ulkan maqsad sari tashlangan muhim qadam bo‘lib, O‘zbekistonning Xitoy bozorida yanada faol va ochiq ishtirokini ta’minlaydi. Marosim yakunida O‘zbekiston vakillari barcha ishtirokchilarni mamlakatimiz go‘shalari bilan yaqindan tanishishga taklif qildi.