Pekinda Shavkat Mirziyoyev va Vladimir Putin uchrashdi
O’zbekiston va Rossiya prezidentlari nimalarni gaplashdi?
Pekin shahrida O‘zbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin o‘rtasida uchrashuv bo‘lib o‘tdi.
Suhbat avvalida Rossiya yetakchisi davlatimiz rahbari hamda O‘zbekiston xalqini Mustaqillik kuni bilan samimiy tabriklab, farovonlik va barqaror taraqqiyot tiladi.
Muloqot chog‘ida ilgari erishilgan oliy darajadagi kelishuvlarni amalga oshirish nuqtayi nazaridan O‘zbekiston – Rossiya keng qamrovli strategik sheriklik va ittifoqchilik munosabatlarini yanada kengaytirish va mustahkamlash masalalari ko‘rib chiqildi.
Tomonlar savdo-iqtisodiy va investitsiyaviy hamkorlik sur’atini saqlab qolish bo‘yicha muvofiqlashtirilgan choralarni qabul qilish zarurligini ta’kidladilar. Shuningdek, iqtisodiyotning ustuvor tarmoqlarida qo‘shma loyihalarni tayyorlash va amalga oshirishni jadallashtirish, hududlararo aloqalar hamda tashkil etilgan qo‘shma sanoat parklaridagi kooperatsiyani rivojlantirish masalalariga alohida e’tibor qaratildi.
Gumanitar sohada, xususan madaniyat, san’at, fan va ta’lim yo‘nalishlarida samarali hamkorlik yo‘lga qo‘yilgani mamnuniyat bilan qayd etildi.
Shuningdek, O‘zbekiston va Rossiya Prezidentlari xalqaro ahamiyatga molik dolzarb masalalar yuzasidan ham fikr almashdilar.
