Qobuljon Ahmedov OAV uchun kontent tayyorlash markaziga direktor bo‘ldi
Markaz direktoriga ikki nafar o‘rinbosar ham tayinlandi.
O‘zbekiston Respublikasi Prezidenti Administratsiyasi huzuridagi Ommaviy axborot vositalari uchun kontent tayyorlash markaziga yangi rahbar tayinlandi. Prezident Administratsiyasining tegishli farmoyishiga ko‘ra, Qobuljon Xoliqovich Ahmedov markaz direktori lavozimida ish boshladi.
Qobuljon Ahmedov avval MY5 telekanaliga boshchilik qilgan, shuningdek, tayinlovga qadar MTRK tarkibidagi “Yoshlar” ijodiy birlashmasi direktori sifatida faoliyat yuritgan. Tajribali media mutaxassisi endilikda davlat ommaviy axborot vositalari uchun sifatli kontent ishlab chiqarishni yangi bosqichga olib chiqish ustida ishlaydi.
Markaz direktorining ikki nafar o‘rinbosari ham belgilandi. Unga ko‘ra, taniqli rejissyor Husan Ravshanovich Salixov direktor o‘rinbosari etib tayinlandi. U ilgari Prezident Matbuot xizmatining Media markaziga rahbarlik qilgan. Yana bir o‘rinbosar Jahongir Muhammadali o‘g‘li Abdurahmonov bo‘lib, u tayinlovdan avval Prezident Matbuot xizmatida bosh konsultant lavozimida ishlagan va “Uzreport” telekanalida shef-muharrir bo‘lgan.
Eslatib o‘tamiz, shu yil iyul oyida Axborot va ommaviy kommunikatsiyalar agentligi (AOKA) tugatilib, uning asosida Milliy kontent ishlab chiqaruvchi markaz tashkil etilgandi. Shuningdek, Prezident Administratsiyasi Media markazi negizida Ommaviy axborot vositalari uchun kontent tayyorlash markazi faoliyat boshladi.
