“Dovut ota” chegara postidagi cheklovlar yil oxirigacha uzaytirildi
Bojxona qo‘mitasi chegara postida ikkinchi bosqich rekonstruksiya ishlari boshlanganini ma'lum qilgan.
Qozog‘istonning “Tajen” va O‘zbekistonning “Dovut ota” chegara o‘tkazish punktlarida joriy yilning 1-fevralidan qo‘llanilgan cheklovlar 2025-yil 31-dekabriga qadar uzaytirildi. Bu haqda Qoraqalpog‘iston Bojxona boshqarmasi xabar berdi. Cheklovlar jismoniy shaxslar, yengil avtomobillar, avtobuslar hamda og‘irligi 3,5 tonnagacha bo‘lgan yuk mashinalariga tatbiq etiladi.
Bojxona qo‘mitasi ma’lum qilishicha, muddatning cho‘zilishi chegara postidagi ikkinchi bosqich rekonstruksiya ishlari bilan bog‘liq. Hozirda ma’muriy binolar kapital ta’mir qilinmoqda, yo‘l qoplamalari betonlashtirilmoqda. Ushbu ishlar tugamaguncha chegara orqali harakat cheklangan holda qoladi.
Biroq, umumiy og‘irligi 3,5 tonnadan ortiq bo‘lgan yuk mashinalariga harakatlanishga ruxsat berilgan. Shu bilan birga, jismoniy shaxslar uchun “Qoraqalpog‘iston” temiryo‘l o‘tkazish punkti orqali “Nukus–Beyneu” yo‘nalishida qo‘shimcha yo‘lovchi poyezdlari qatnovi yo‘lga qo‘yilgan.
Ma’lumot uchun, bu post orqali harakatlanish dastlab fevral oyidan uch oy muddatga to‘xtatilgandi. Keyinchalik rekonstruksiya ishlari cho‘zilib, muddat 1-sentabrgacha uzaytirilgan, endi esa yil oxirigacha davom etishi ma’lum qilindi.
