O‘zbekistonlik yosh dzyudochilar jahon chempionatida mutlaq g‘olib bo‘ldi
Bolgariyada bo‘lib o‘tgan musobaqada o‘zbekistonlik kadetlar 5 oltin, 2 bronza va 1 kumush medalni qo‘lga kiritdi.
Bolgariyada o‘tkazilgan dzyudo bo‘yicha kadetlar o‘rtasidagi jahon chempionatida O‘zbekiston terma jamoasi tarixiy natijaga erishdi. Yosh dzyudochilarimiz jami 5 ta oltin va 2 ta bronza medalini qo‘lga kiritib, 71 davlat orasida umumjamoa hisobida birinchi o‘rinni egalladi.
Oltin medallarni Dilafruz Boltaboyeva (-40 kg), Xushnud Sultonov (-50 kg), Xushnudbek Burhonov (-55 kg), Inomjon Bahodirov (-81 kg) va Umida Nig‘matova (+78 kg) qo‘lga kiritdi. Shuningdek, Dilshod Karimov (-60 kg) va Sa’dulla Ravshanov (-73 kg) bronza bilan taqdirlandi.
Medallar soniga ko‘ra, O‘zbekiston terma jamoasi IJF bayrog‘i ostida qatnashgan rossiyalik sportchilar (4 oltin, 3 bronza) va Braziliya (2 oltin, 1 kumush, 2 bronza) terma jamoalarini ortda qoldirdi.
Aralash jamoaviy bahslarda esa O‘zbekiston kadetlar jamoasi ilk bor finalga chiqib, kumush medalni qo‘lga kiritdi. Murosasiz kechgan hal qiluvchi bahsda dzyudochilarimiz Yaponiyaga imkoniyatni boy berdi.
