Toshkent viloyatida chumchuq go‘shtidan kabob tayyorlagan choyxona rahbari jarimaga tortildi
Yangiyo‘lda noqonuniy ov holati uchun 4,12 mln so‘m jarima belgilandi.
Ijtimoiy tarmoqlarda Toshkent viloyatining Yangiyo‘l tumanida joylashgan choyxonalardan birida chumchuq go‘shtidan kabob tayyorlanayotgani aks etgan video tarqaldi. Viloyat ekologiya boshqarmasi holat yuzasidan rasmiy bayonot berdi.
Tekshiruv davomida hozirda ushbu choyxonada chumchuq go‘shtidan kabob tayyorlanmayotgani aniqlangan. Davlat inspektorlari choyxona rahbaridan izoh olganida, u mazkur videolavha ilgari, mijozlar sonini oshirish maqsadida olinganini va hozirda bunday holatga yo‘l qo‘yilmayotganini ma’lum qilgan.
Mutasaddilar rahbarni kelgusida bunday qonunbuzarlikni takrorlamaslik bo‘yicha ogohlantirdi. Shuningdek, unga nisbatan Ma’muriy javobgarlik to‘g‘risidagi kodeksning 63-moddasi 1-qismi (“Noqonuniy ov”) bo‘yicha ma’muriy bayonnoma rasmiylashtirildi.
Natijada choyxona rahbariga 4 million 120 ming so‘m miqdorida jarima qo‘llanildi. Ekologiya boshqarmasi esa bu kabi holatlar takrorlanmasligi uchun muntazam nazorat olib borilishini bildirdi.
