Toshkentda noqonuniy kripto-aktivlar aylanmasi bilan shug‘ullangan jinoiy guruh fosh etildi
Ular kriptovalyuta orqali 180 mlrd so‘mlik noqonuniy operatsiyani amalga oshirgan.
Toshkentda kripto-aktivlar orqali noqonuniy moliyaviy operatsiyalar amalga oshirgan jinoiy guruh qo‘lga olindi. Bu haqda “Kiberxavfsizlik markazi” DUK matbuot xizmati ma’lum qildi.
Huquq-tartibot idoralari xabariga ko‘ra, guruh a’zolari xorijiy bukmekerlik kompaniyalari bilan hamkorlik qilib, noqonuniy yo‘llar orqali mablag‘larni kripto-aktivlar aylanmasi orqali qonuniylashtirishga uringan. Ushbu faoliyatda ular qonunda belgilangan tartiblarni buzgan holda Desent platformasidan foydalangan.
Yashnobod tumanida o‘tkazilgan tezkor tadbir davomida gumonlanuvchilar qo‘lga olinib, ularning joriy yil yanvar oyidan buyon umumiy qiymati 180 milliard so‘mdan ortiq noqonuniy operatsiyalar amalga oshirgani fosh etildi.
Tekshiruv jarayonida jinoyat daromadlarini yashirish uchun foydalanilgan 38 dona mobil telefon va mingga yaqin plastik kartalar ashyoviy dalil sifatida olib qo‘yildi.
Holat yuzasidan Jinoyat kodeksining tegishli moddasi bilan jinoyat ishi qo‘zg‘atilib, tergov ishlari olib borilmoqda.
