Turkiya va Bolgariyada halok bo‘lgan 6 nafar o‘zbekistonlikning jasadi vatanga olib kelindi
Konsulxona jasadlarni qaytarishda, shuningdek, qarzga botgan va hujjatsiz qolgan vatandoshlarni qo‘llab-quvvatlashda yordam bergan.
Bolgariyaning Sozopol shahrida cho‘kib ketgan 22 yoshli o‘zbekistonlik talabaning jasadi, shuningdek, Turkiyada turli sabablarga ko‘ra vafot etgan yana besh nafar vatandoshning jasadi O‘zbekistonga olib kelindi. Bu haqda O‘zbekistonning Istanbuldagi Bosh konsulxonasi ma’lum qildi.
Diplomatik vakolatxona xabariga ko‘ra, jasadlarni vatanga qaytarish bilan bir qatorda, Turkiyada davolanish chog‘ida katta qarzga botib qolgan 12 nafar vatandoshga ham yordam ko‘rsatildi. Shifoxonalardagi qarzlari bo‘yicha chegirmalar berildi, ularning sog‘ligi tiklanganidan so‘ng uylariga qaytishlariga yordam berildi.
Bundan tashqari, hujjatsiz qolib ketgan 27 nafar o‘zbekistonlikning ham hujjatlari rasmiylashtirilib, yurtga qaytishlari ta’minlandi.
Eslatib o‘tamiz, 7-avgust kuni Bolgariyaning Sozopol shahrida 22 yoshli talaba do‘stlari bilan cho‘milishga borganda, kuchli oqimga tushib ketib, cho‘kib ketgani haqida xabar berilgandi. Ikki kun davom etgan qidiruv ishlari 9-avgust kuni yakun topdi. Uning jasadi suv ostidagi yirik qoya oralig‘idan topildi. Qutqaruv xizmati jasadni topa olmagan bo‘lsa-da, talabaning o‘zbek, qirg‘iz va moldovalik do‘stlari qariyb to‘qqiz soat davomida izlab, uni qoya ostidan olib chiqishga muvaffaq bo‘lishdi.
