O‘zbekistonda shaxsiy avtomobillarni olib kirish tartibi soddalashtirildi
Yuridik shaxslar uchun avtomobil turini ma’qullash hujjatlari muddati 3 yildan 5 yilgacha uzaytirildi.
Prezident Administratsiyasi topshirig‘iga asosan, shaxsiy va xizmat ehtiyojlari uchun olib kiriladigan transport vositalarining muvofiqligini baholash tartib-taomillari soddalashtirildi.
Idoralararo komissiya qaroriga ko‘ra:
Yuridik shaxslar uchun avtomobil turini ma’qullash hujjatining amal qilish muddati 3 yildan 5 yilgacha uzaytirildi;
Jismoniy shaxslar tomonidan shaxsiy ehtiyoj uchun olib kiriladigan bir dona avtomobilni Piskent poligonida majburiy sinovdan o‘tkazish talabi bekor qilindi.
Statistik ma’lumotlarga ko‘ra, 2020-yilda mamlakatda rasman faqat 3 ta dilerlik markazi faoliyat yuritgan bo‘lsa, bugungi kunda ularning soni 21 taga yetdi.
Turini ma’qullagan avtomobil modellari soni so‘nggi yillarda 15 tadan 101 taga oshdi.
2024-yilning birinchi yarim yilligida jismoniy shaxslar tomonidan olib kirilgan avtomobillar soni o‘tgan yilga nisbatan 2 693 taga ko‘paydi.
Mutasaddilarning qayd etishicha, 2024-yil 1-noyabrdan boshlab transport vositalari muvofiqligi bo‘yicha ayrim majburiy ko‘rsatkichlarni Piskent poligonida sinovdan o‘tkazish yo‘lga qo‘yilgan edi. Biroq mavjud infratuzilmaning yetarli emasligi sababli navbatlar 1 oydan 3 oygacha cho‘zilib ketdi va aholining e’tirozlari kuchaydi. Shu bois tizimni yanada qulaylashtirish choralari ko‘rildi.
Mazkur o‘zgarishlar avtomobillarning xavfsizlik talablariga rioya etilishini ta’minlash, iste’molchilar huquqlarini himoya qilish, mahalliy ishlab chiqaruvchilar faoliyatini qo‘llab-quvvatlash va avtomobil bozorida sog‘lom raqobatni rivojlantirishga qaratilgan.
