Yangi Toshkent xalqaro aeroporti uchun 1310 gektar yer ajratildi
Yangi aeroport amaldagi aeroportdan 17 km janubda joylashib, yiliga 20 mln yo‘lovchiga xizmat ko‘rsatadi.
Toshkent viloyatida barpo etilishi rejalashtirilgan Yangi Toshkent xalqaro aeroporti uchun qariyb 1310 gektar yer maydoni ajratildi. Bu haqda Kadastr agentligi viloyat boshqarmasi matbuot xizmati ma’lum qildi.
Ta’kidlanishicha, ajratilgan hududlarning 1075 gektardan ortig‘i sug‘oriladigan yerlardan iborat bo‘lib, qolgan qismini bog‘, yaylov hamda boshqa turdagi maydonlar tashkil etadi. Jumladan, O‘rtachirchiq tumanida 790 gektardan ortiq, Quyichirchiqda esa 519 gektar yer mazkur loyiha uchun belgilangan.
Yangi aeroport Toshkent shahridagi amaldagi xalqaro aeroportdan taxminan 17 kilometr janubda joylashadi. Qurilishning birinchi bosqichi yakunlangach, yiliga 20 milliongacha yo‘lovchiga xizmat ko‘rsatish imkoniyati yaratiladi. Loyihaga ko‘ra, soatiga 40 ta samolyot qabul qilish imkoniyati bo‘ladi va aeroport bir vaqtning o‘zida 169 ta havo kemasini sig‘dira oladi.
Terminal infratuzilmasida dastlab 14 ta teletrap bo‘lishi rejalashtirilgan, keyinchalik ularning soni 45 taga yetkaziladi. Yo‘lovchilar uchun barcha asosiy xizmatlar bevosita terminal ichida qulay tarzda taqdim etiladi.
Mazkur loyiha davlat-xususiy sheriklik asosida amalga oshiriladi. Loyiha qiymati va jalb qilinadigan investorlar to‘g‘risida batafsil ma’lumot keyinchalik e’lon qilinishi kutilmoqda.
