Farg‘onada bog‘chada 13 nafar bola zaharlanish alomatlari bilan kasalxonaga yotqizildi
Hodisa yuz bergan maktabgacha ta’lim muassasasi faoliyati vaqtincha to‘xtatildi.
Joriy yilning 22-avgust kuni Farg‘ona viloyati Oltiariq tumanining Qiziltepa qishlog‘ida joylashgan 7-sonli davlat maktabgacha ta’lim tashkilotida bolalar ovqatdan zaharlanish alomatlari bilan shifoxonaga yotqizilgan.
Dastlabki ma’lumotlarga ko‘ra, mazkur muassasada tarbiyalanayotgan 13 nafar bola shifokorlar ko‘rigidan o‘tkazilgan va ularning sog‘lig‘iga zaruriy tibbiy yordam ko‘rsatilmoqda.
Voqea ortidan maktabgacha ta’lim tashkiloti faoliyati vaqtincha to‘xtatildi. Sog‘liqni saqlash vazirligi, Sanitariya-epidemiologiya xizmati hamda boshqa tegishli nazorat organlari tomonidan hodisa sabablarini aniqlash, shuningdek, kelgusida bunday holatlarning oldini olish maqsadida keng qamrovli tekshiruv ishlari olib borilmoqda.
Mas’ul idoralar tekshiruv natijalariga ko‘ra qonun doirasida tegishli choralar ko‘rilishini hamda jamoatchilikka qo‘shimcha ma’lumot berilishini ma’lum qilmoqda.
