“Hisobotlarda 900 ming ish o‘rni soxta ko‘rsatildi” — Nig‘matilla Yo‘ldoshev
Senat majlisida bosh prokuror o‘tgan yili haqiqatda yaratilmagan qariyb 900 ming ish o‘rni hisobotlarga qo‘shib yozilgani va bu borada qonuniy choralar ko‘rilgani haqida ma’lumot berdi.
Senat majlisida bosh prokuror haqiqatda yaratilmagan 900 ming ish o‘rni hisobotlarga qo‘shib yozilgani haqida ma’lumot berdi.
O‘zbekiston Respublikasi Bosh prokurori Nig‘matilla Yo‘ldoshev 5-sentabr kuni Senat majlisida mamlakatda kambag‘allikni qisqartirish borasida amalga oshirilgan ishlarni muhokama qilar ekan, bir qator jiddiy kamchiliklarni ta’kidladi.
Qayd etilishicha, 2024-yilda hisobotlarda haqiqatda mavjud bo‘lmagan 900 mingga yaqin ish o‘rni kiritilgan, 78 ta holatda 12 mlrd so‘mlik ish haqi talon-toroj qilingan. Shu bilan birga, fuqarolarga to‘lanmay qolgan 11 mlrd so‘m miqdoridagi ish haqlari undirib berildi.
Shuningdek, prokuratura organlari o‘tgan yili 29 mingdan ortiq tadbirkor va investorlarning muammolarini hal qilishda amaliy yordam ko‘rsatdi. Natijada 7 mingdan ortiq yangi korxona tashkil etilib, 22 mingga yaqin yangi ish o‘rinlari yaratilgan.
Yashirin iqtisodiyotga qarshi kurashish jarayonida esa 3 trln 449 mlrd so‘mlik soliqlarni to‘lashdan bo‘yin tovlash holatlari fosh etildi. Bundan tashqari, yirik soliq to‘lovchilar bo‘yicha nazorat mexanizmlaridagi kamchiliklar bartaraf etilib, davlat byudjetiga qo‘shimcha 200 mlrd so‘mdan ortiq mablag‘ tushishi ta’minlandi.
