Endilikda alkagolga qaram haydovchilar va yo‘l bezorilari maxsus nazorat ostida bo‘ladi
Yangi tartib takror huquqbuzarliklarning oldini olish va yo‘l xavfsizligini ta’minlashga qaratilgan.
Senat yo‘l harakati xavfsizligi bo‘yicha muhim tashabbusni ma’qulladi. Endilikda mast holda transport boshqargan yoki yo‘lda bezorilik qilganligi sababli sud qarori bilan haydovchilik huquqidan mahrum qilingan shaxslar profilaktik nazorat ostiga olinadi.
Qonun bilan ushbu toifa fuqarolar “profilaktik hisob”ga kiritilib, inspektorlar tomonidan muntazam kuzatuvga olinishi belgilandi. Mazkur mexanizm qayta-qayta huquqbuzarliklarning oldini olish, fuqarolarga mas’uliyatini eslatib turish hamda zarur hollarda ularni suhbatlarga chaqirish yoki yashash joyida monitoring o‘tkazishni nazarda tutadi.
Statistik ma’lumotlarga ko‘ra, 2024-yilda haydovchilik guvohnomasidan mahrum etilgan qariyb 11 ming fuqaro tomonidan 23 mingdan ortiq qoida buzilishi qayd etilgan. Ulardan mingdan ziyod YTH sodir bo‘lgan bo‘lib, natijada 300 ga yaqin inson vafot etgan, qariyb 900 kishi turli jarohatlar olgan.
Yangi tartib profilaktika inspektorlariga yo‘l harakati politsiyasi bilan hamkorlikda bunday shaxslarni kuzatish, ularning noqonuniy ravishda yana rulga o‘tirmasligini ta’minlash imkonini beradi. Ushbu yondashuv yo‘llarda xavfsizlikni oshirish va fojiali oqibatlarning oldini olishga xizmat qiladi.
