Oktabr oyidan “chiroyli” avtoraqamlarni birja orqali sotish to‘xtatiladi
Endilikda haydovchilar xohlagan harf va raqam kombinatsiyasini yagona elektron tizim orqali olishlari mumkin bo‘ladi.
Hukumat qaroriga ko‘ra, 2024-yil 1-oktabrdan boshlab “O‘zbekiston respublika tovar-xomashyo birjasi” orqali “chiroyli” avtoraqamlarni sotish auksionlari to‘xtatiladi.
Yangi tartibga ko‘ra, 1–3 toifadagi raqamlar “O‘zavtomotobelgi” korxonasi tomonidan belgilangan yagona oshirilgan tarif asosida sotiladi. 4–6 toifadagi raqamlar esa amaldagi tartibda, qo‘shimcha to‘lovsiz beriladi. 2026-yil 1-yanvardan boshlab birja orqali auksion o‘tkazish va talab yuqori kombinatsiyalarni oshirilgan tarifda berish tartibi butunlay bekor qilinadi.
Shundan so‘ng fuqarolar o‘zlari xohlagan harf va raqam kombinatsiyasiga ega davlat raqam belgilarini yagona elektron murojaat orqali olishlari mumkin bo‘ladi. Shu maqsadda ochiq ma’lumotlar bazasi ishga tushiriladi. Unga YHXX mobil ilovasi, rasmiy sayt, davlat xizmatlari portali va infokioskalar orqali kirish imkoniyati yaratiladi.
Ma’lum qilinishicha, barcha raqam belgilarining ma’lumotlari hududiy kodlar bo‘yicha yagona bazaga joylashtiriladi. Kelgusida esa “obro‘li” kombinatsiyalar faqatgina hududiy kod bo‘yicha 90 foiz raqamlar band bo‘lganda mavjud bo‘ladi.
