Samarqandda 100 yillik chinorlar kesib tashlangani aytilmoqda

So‘nggi kunlarda ijtimoiy tarmoqlarda Samarqand shahridagi Bulvar hududida qadimiy, yuz yillik chinorlar kesilayotgani haqida xabarlar tarqalib, bu holat jamoatchilikda katta munozaralarga sabab bo‘ldi. Aholi daraxtlar shahar manzarasining ajralmas qismi ekanini ta’kidlab, ularning kesilishiga norozilik bildirdi.

 

Mazkur vaziyat yuzasidan Samarqand viloyati hokimligi axborot xizmati rasmiy izoh berdi. Unga ko‘ra, 7-sentyabr kuni Amir Temur maqbarasi yaqinida joylashgan uch tup chinor daraxti tashqi ta’sirlar oqibatida chirib, tanasida g‘ovaklar paydo bo‘lgani, yo‘l tomonga xavfli darajada og‘ib qolganligi aniqlangan. Shu bois ular insonlar hayoti va mol-mulkiga xavf tug‘dirishi sababli kesilgan.

 

Mutasaddi tashkilotlar – Ekologiya boshqarmasi, Favqulodda vaziyatlar boshqarmasi hamda O‘simliklar karantini xodimlaridan iborat ishchi guruh tomonidan o‘rganish o‘tkazilib, daraxtlarning mustahkamligi butunlay yo‘qotilgani haqida xulosa berilgan.

 

Hokimlik ma’lumotiga ko‘ra, kesilgan chinorlarning o‘rniga yosh, lekin qimmat navli ko‘chatlar ekiladi. Bu ishni amalga oshirish shahar obodonlashtirish boshqarmasiga topshirilgan.