Shota Rustaveli ko‘chasi rekonstruksiyasidan so‘ng yo‘lovchi tashish hajmi ikki barobar oshadi

Transport vazirligi Shota Rustaveli ko‘chasida olib borilayotgan keng ko‘lamli rekonstruksiya ishlari bo‘yicha dastlabki natijalarni e’lon qildi. Mutaxassislarning hisob-kitoblariga ko‘ra, loyiha yakunlangach, yo‘lovchi tashish hajmi kuniga qariyb 300 ming kishiga yetadi, transport harakati esa sezilarli darajada qulaylashadi.

 

Yangi tizim doirasida avtobus yo‘nalishlari soni 40 foizga oshib, kuniga 2 mingdan 2,8 ming marotabagacha yetkazilishi ko‘zda tutilgan. Bu esa yo‘lovchilar oqimining ikki barobarga ko‘payishiga zamin yaratadi.

 

Rekonstruksiya natijasida:

 

o‘rtacha sayohat vaqti 25 daqiqadan 18 daqiqagacha qisqaradi;

 

avtobus tezligi 18,5 km/soatdan 23,6 km/soatgacha oshadi;

 

harakat intervali 7 daqiqa atrofida bo‘ladi.

 

Shuningdek, ko‘chada 11 ta yangi bekat, 500 ga yaqin avtoturargoh, velosiped yo‘laklari, 21 ta piyoda va veloyo‘lak o‘tish joylari barpo etiladi. 10 ta harakat yo‘lagining 6 tasi avtomobillar, 2 tasi avtobuslar, qolgan 2 tasi esa to‘xtash joylari uchun mo‘ljallanadi.

 

Transport vazirligi ma’lum qilishicha, rekonstruksiya yakunlangach, avtobuslar harakat jadvali qayta optimallashtiriladi, tirbandliklarning oldini olish va yo‘lovchilar uchun xavfsiz hamda qulay transport xizmatlarini ta’minlash bo‘yicha aniq choralar amalga oshiriladi.