Tashqi ishlar vaziri faoliyatini davom ettirmoqda – rasmiy bayonot

Qozog‘iston bosh vaziri o‘rinbosari – tashqi ishlar vaziri Murat Nurtleu 6-sentabr kuni hukumat binosida jurnalistlar oldida chiqish qilib, uning “qo‘lga olingani” haqidagi tarqalgan ma’lumotlarni mutlaqo yolg‘on va asossiz deb atadi.

 

“Bu yolg‘on va bema’nilik. Izoh berishga ham arzimaydi. Men o‘tgan hafta ham ishda bo‘ldim, uchrashuvlar o‘tkazdim, xorijiy hamkasblarim bilan telefon orqali muloqot qildim, investorlar bilan muzokaralar o‘tkazdim. Hammasi odatdagidek davom etmoqda”, — dedi vazir.

 

Murat Nurtleuning ta’kidlashicha, u prezidentning Murojaatnomasidan so‘ng xorijiy safarga chiqishni rejalashtirgan. Shuningdek, u mazkur yolg‘on xabarlar yuzasidan huquqni muhofaza qiluvchi organlarga murojaat qilishni shaxsiy zarurat deb bilmasligini qo‘shimcha qildi.

 

Qozog‘iston Tashqi ishlar vazirligi ham rasmiy bayonot berib, “Murat Nurtleuning hibsga olingani haqidagi xabar haqiqatga to‘g‘ri kelmaydi, bu jurnalist etikasi va amaldagi qonunchilikning qo‘pol buzilishidir”, deya ma’lum qildi.

 

Shuningdek, Dezinformatsiyaga qarshi kurash markazi ham ushbu yolg‘on ma’lumotlarni rad etdi va yolg‘on xabar tarqatish qonun bilan jazolanishini, jumladan jinoiy javobgarlikka sabab bo‘lishini eslatdi. Qozog‘iston Milliy xavfsizlik qo‘mitasi ham MQB xodimlari hibsga olingani haqidagi xabarlarni inkor etdi.

 

Ayni paytda prokuratura “O‘rda” nashrining bosh muharririni yolg‘on axborot tarqatish bo‘yicha jinoiy javobgarlik haqida ogohlantirdi.