Toshkentda fuqaroning kartasidan 19 mln so‘m o‘g‘irlandi
Gumonlanuvchi qo‘lga olinib, unga nisbatan jinoyat ishi ochildi.
Toshkent shahar IIBB matbuot xizmati poytaxtda sodir bo‘lgan o‘g‘irlik jinoyati yuzasidan ma’lumot berdi.
Arizachining ma’lum qilishicha, uning bank kartasidan jami 19 million so‘m mablag‘ noqonuniy ravishda yechib olingan. Mazkur murojaat asosida ichki ishlar organlari tomonidan tezkor-surishtiruv ishlari olib borilib, gumonlanuvchi aniqlanib qo‘lga olindi. U Chilonzor tumanida yashovchi Murod ismli fuqaro ekani ma’lum bo‘ldi.
Hozirda unga nisbatan O‘zbekiston Respublikasi Jinoyat kodeksining “O‘g‘irlik” moddasi bo‘yicha jinoyat ishi qo‘zg‘atilgan. Mazkur moddaning uchinchi qismida belgilanganidek, bunday jinoyat uchun 8 yilgacha ozodlikdan mahrum qilish jazosi ko‘zda tutilgan.
Shuningdek, huquqni muhofaza qiluvchi organlar gumonlanuvchining boshqa jinoyatlarga aloqadorligini aniqlash maqsadida tergov-tezkor tadbirlarni davom ettirmoqda.
