Bog‘chalarni ishga tushirish bo‘yicha viloyat va tumanlar hokimlariga 1 noyabrgacha muhlat berildi
Shuningdek, ikki yil ichida bog‘cha va maktablar o‘rni 3 barobar oshgan Qashqadaryo tajribasini barcha hokimlarga o‘rganish topshirildi.
Joriy yil boshidan boshlab maktabgacha taʼlim tizimini yana-da rivojlantirish va bolalar uchun qulay sharoitlar yaratish bo‘yicha qator chora-tadbirlar belgilandi. Prezident videoselektor yig‘ilishida bog‘cha o‘rinlarini ko‘paytirish, mavjud bog‘chalarni taʼmirlash va jihozlash hamda xususiy sektor va xorijiy hamkorlik orqali yangi imkoniyatlar yaratish masalalari alohida taʼkidlandi.
Joriy yilda bog‘cha o‘rinlarini qo‘shimcha 182 mingtaga ko‘paytirish rejalashtirilgan. Ularning 82 mingi yangi bog‘chalar hissasiga to‘g‘ri keladi.
Tumanlar hokimlari qolgan o‘rinlar nima hisobidan yaratilishini o‘ylamayotgani tanqid qilindi.
Misol uchun, 118 ta bog‘chadagi 255 ta xona taʼmirga muhtoj bo‘lgani uchun bo‘sh turibdi. Yoki joylarda 8 ta bog‘chani qurish va taʼmirlash 2-3 yildan beri cho‘zilmoqda.
Chimboy, G‘allaorol, Qiziriq, Boysundagi 1 tadan bog‘cha hali taʼmirdan chiqmagan. Dehqonobod, Sariosiyo, Bo‘stonliq, Nurafshonda 1 tadan yangi bog‘cha qurilishi yakunlanmagan.
Viloyat va tumanlar hokimlariga 118 ta bog‘chadagi xonalarni taʼmirlab jihozlashga, yana 8 ta bog‘chani to‘liq ishga tushirishga 1 noyabrgacha muhlat berildi, aks holda tegishli choralar ko‘rilishi haqida ogohlantirildi.
Tadbirkorlar bilan ochiq muloqotda 80 ta tumanda bog‘cha ochish uchun imtiyozlar eʼlon qilindi.
Ushbu mexanizmdan unumli foydalanib, bog‘cha o‘rinlarini ko‘paytirish zarurligi ko‘rsatib o‘tildi.
Qashqadaryoning barcha tumanlarida xususiy sektor va chet ellik hamkorlar bilan ikki yil ichida bog‘cha va maktab o‘rni 3 barobar oshgan. Viloyat hokimlariga bu tajribani o‘rganish topshirildi.
Umuman, har bir tumanda bog‘cha qamrovi 80 foizdan kam bo‘lmasligi shartligi belgilandi. Buning uchun viloyat va tuman hokimlari oldiga bo‘sh yerlarni topib, auksionga chiqarish, Maktabgacha va maktab taʼlimi vazirligi bilan birgalikda qaysi maktab va bog‘chada bo‘sh joy bo‘lsa, bog‘cha qurish rejasini belgilash vazifasi qo‘yildi.
Mutasaddilarga bo‘sh yerlarda bog‘cha tashkil etish bo‘yicha xususiy sheriklik yoki sarmoya kiritish sharti bilan uch yillik dastur qabul qilish, yangi xususiy bog‘chalarga subsidiya berish, tarbiyachilar maoshini qisman qoplash tartibini joriy qilish topshirildi.
