O‘zbekistonda Kasbiy ta’lim agentligi tashkil qilinadi
Texnikumlarni rivojlantirish va yoshlarni kasb-hunarga jalb etish maqsadida yangi agentlik faoliyati yo‘lga qo‘yiladi.
Prezident Shavkat Mirziyoyev raisligida o‘tayotgan yig‘ilishda bu yil 9-sinfni 608 ming o‘quvchi bitirgan bo‘lsa, ularning atigi 182 ming nafari texnikumlarga borayotgani tanqid qilindi. “Bizda 450 ming o‘quvchini qabul qila oladigan 598 ta texnikum bor. Bu yoshlar uchun juda katta resurs, sharoit va imkoniyat. Lekin bu yil 9-sinfni 608 ming o‘quvchi bitirgan bo‘lsa, ularni atigi 182 ming nafari texnikumlarga boryapti. Bugundan boshlab bir yil yoshlarni kasb-hunarga o‘rgatish yili bo‘ladi,” dedi prezident.
Mutasaddilar zimmasiga viloyat va tuman hokimlari bilan birgalikda Prezident va ixtisoslashgan maktabda orttirilgan tajriba asosida joriy yilda 598 ta texnikumga xalqaro standart bo‘yicha zamonaviy kasbga o‘qitish muhitini yaratish vazifasi qo‘yildi.
Umuman, viloyat va tuman hokimlariga kelgusi o‘quv yilida 9-sinf bitiruvchilarining kamida 50 foizini, hozirgiga qo‘shimcha yana 200 ming o‘quvchini texnikumga qamrab olish topshirildi.
