O‘zbekistonda maktab avtobuslari tizimi yo‘lga qo‘yiladi
Qashqadaryo va Surxondaryoda dastlabki yo‘nalishlar ishga tushirildi.
O‘zbekiston hududlarida maktab avtobuslari tizimi bosqichma-bosqich joriy etilishi rejalashtirilmoqda. Ushbu tizim chekka va yetib borish qiyin bo‘lgan hududlarda istiqomat qiluvchi bolalarning ta’lim muassasalariga qulay va xavfsiz yetib borishini ta’minlashga xizmat qiladi.
Bugungi ta’lim sohasiga bag‘ishlangan yig‘ilishda qayd etilishicha, mamlakatimizda hanuz 74 ming nafar o‘quvchi maktabga qatnash uchun har kuni 5–7 kilometr masofani piyoda bosib o‘tmoqda. Bu esa o‘quvchilarning salomatligi, kayfiyati va o‘zlashtirishiga salbiy ta’sir ko‘rsatmoqda.
Amaliy ishlar allaqachon boshlanib, Qashqadaryo va Surxondaryo viloyatlarida mahalliy byudjet mablag‘lari hisobidan 100 ta maktab uchun bepul avtobus yo‘nalishlari tashkil qilindi. Samarqand va Jizzax viloyatlari ham mazkur tashabbusni qo‘llab-quvvatlab, bir oy ichida 100 ta maktab o‘quvchilarini avtobus orqali tashishni yo‘lga qo‘yishni rejalashtirmoqda.
Davlat rahbari yig‘ilishda bu tajribani boshqa hududlarga ham tatbiq etish zarurligini ta’kidladi. Maktab avtobuslarining bosqichma-bosqich joriy etilishi minglab bolalarning maktabga o‘z vaqtida va xavfsiz yetib borishini ta’minlaydi, ta’lim sifati va qamrovini yanada oshirishga yordam beradi.
