Qozog‘istonda Sun’iy intellekt vazirligi tashkil etiladi
Yangi tashabbus davlat boshqaruvi tizimini shaffof va samarali qilish, innovatsion rivojlanishga xizmat qiladi.
Qozog‘iston Prezidenti Qosim-Jomart Toqayev mamlakat xalqiga qilgan murojaatida yangi — Sun’iy intellekt vazirligini tashkil etish tashabbusini ilgari surdi. Davlat rahbarining ta’kidlashicha, bu qadam Qozog‘istonning raqamli transformatsiya jarayonlarini yangi bosqichga olib chiqadi.
Prezident nutqida “Raqamli kod to‘g‘risida”gi qonunni tezkor qabul qilish zarurligi ham qayd etildi. Mazkur hujjat raqamlashtirishning asosiy yo‘nalishlari — sun’iy intellekt, platforma iqtisodiyoti, katta ma’lumotlardan foydalanish va boshqa dolzarb sohalarni qamrab olishi lozimligi alohida ta’kidlandi.
Toqayevning fikricha, yangi texnologik davrning to‘laqonli ishtirokchisiga aylanish uchun davlat boshqaruvi tizimi shaffoflik, samaradorlik va inson manfaatlariga yo‘naltirilganlik tamoyillari asosida tubdan qayta qurilishi talab etiladi. Shu bois, mavjud vazirliklarning faoliyati qayta ko‘rib chiqilib, ularning negizida yangi Sun’iy intellekt vazirligi shakllantiriladi.
Mazkur tashabbus Qozog‘istonni mintaqada ilg‘or texnologik markazlardan biriga aylantirish, iqtisodiyotda innovatsion rivojlanishni jadallashtirish hamda global raqamli maydonda davlatning o‘rnini mustahkamlashga xizmat qilishi kutilmoqda.
