Suriyadagi operatsiyalarda o‘zbekistonlik jangarilar qo‘lga olindi

Suriyaning Idlib viloyatida xorijlik jangarilarga qarshi olib borilayotgan keng ko‘lamli operatsiyalar davomida bir nechta O‘zbekiston fuqarolari hibsga olindi. Bu haqda mintaqadagi xavfsizlik manbalari xabar bermoqda.

 

Ma’lumotlarga ko‘ra, iyun oyida “Abu Dujana” laqabi bilan tanilgan o‘zbekistonlik harbiy instruktor Ayyub qo‘lga olingan. Shuningdek, avgust oyida Idlibdagi yashirin manzillardan birida yana bir fuqaro — Islom ushlangan. 3-sentabr kuni Haram hududida IShIDga aloqador yacheyka faoliyati to‘xtatildi, natijada O‘zbekiston va Iroq fuqarolari hibsga olindi.

 

So‘nggi yillarda bunday operatsiyalar muntazam davom etmoqda. 2020-yildan buyon “Shara hukumati” tuzilmalari “Al-Qoida” bilan aloqador “Katibat at-Tavhid val-Jihod” guruhining bir qator o‘zbek jangarilarini ham qo‘lga olgan.

 

Mutaxassislarning qayd etishicha, mazkur choralar Idlibdagi qurolli tuzilmalar ustidan nazoratni mustahkamlash, xorijlik jihodchilar ta’sirining kengayib ketishiga yo‘l qo‘ymaslik va mintaqaviy xavfsizlikni ta’minlashga qaratilgan.