O‘zbekistonda harbiy va idoraviy formaga o‘xshash kiyim kiyish taqiqlanadi
Forma nusxalarini ishlab chiqarish va ulardan foydalanish ham noqonuniy deb belgilanadi.
O‘zbekistonda harbiy yoki davlat idoralari formalariga o‘xshash kiyim-boshni joriy etish va undan foydalanishga nisbatan javobgarlik belgilanmoqda. Bu haqda Normativ-huquqiy hujjatlar loyihalari muhokamasi portalida joylashtirilgan qonun loyihasida ma’lum qilindi.
Bosh prokuratura tomonidan ishlab chiqilgan tashabbusga ko‘ra, xizmat kiyimini qonunga xilof ravishda kiyish holatlariga barham berish maqsad qilingan. Mazkur normalar Ma’muriy javobgarlik to‘g‘risidagi kodeksning 209¹-moddasiga qo‘shimchalar kiritish orqali joriy etilishi kutilmoqda.
Qonun loyihasida belgilanishicha, harbiy yoki idoraviy forma elementlari bo‘lgan kiyimlarni ruxsatsiz kiygan shaxslar jarimaga tortiladi, kiyim esa musodara qilinadi. Jarima miqdori BHMning ikki baravaridan besh baravarigacha etishi mumkin.
Shuningdek, mato rangi, tikilish uslubi yoki ramzlari jihatidan harbiy va idoraviy formaga o‘xshash kiyimlarni ishlab chiqarish va ulardan foydalanish ham noqonuniy hisoblanadi. Bunday huquqbuzarlik sodir etilgan taqdirda kiyim musodara qilinib, BHMning besh baravaridan o‘n baravarigacha jarima qo‘llanadi.
Mazkur hujjat hozirda jamoatchilik muhokamasiga qo‘yilgan.
