Qirg‘izistondan noqonuniy olib kelingan tilla buyumlari ushlab qolindi
DXX fosh etilgan voqea bo‘yicha Zamon.uz’ni xabardor qildi.
Davlat xavfsizlik xizmati Farg‘ona viloyati boshqarmasi xodimlari tomonidan bojxona organlari bilan hamkorlikda o‘tkazilgan tezkor tadbir davomida katta miqdordagi zargarlik buyumlari kontrabandasiga chek qo‘yildi.
Aniqlanishicha, Farg‘ona tumanida yashovchi fuqaro (1987 y.t.) Qirg‘izistonlik shaxs tomonidan aylanma yo‘llar orqali davlat chegarasidan noqonuniy olib kirilgan qimmatbaho buyumlarni qabul qilib olgan. U mazkur zargarlik mahsulotlarini moddiy manfaat evaziga Farg‘ona shahrida uni kutib turgan Andijon viloyati, Jalaquduq tumanida yashovchi (1997 y.t.) boshqa bir shaxsga topshirayotgan vaqtida qo‘lga olingan.
Olib qo‘yilgan tilla buyumlarning umumiy og‘irligi 5 kilogramm 706 grammni tashkil etib, dastlabki baholashga ko‘ra, qiymati 5 milliard 746 million so‘mga teng.
Hozirda mazkur holat yuzasidan tergovga qadar tekshiruv ishlari olib borilmoqda.
