Shvetsiya sog‘liqni saqlash vaziri matbuot anjumanida hushidan ketdi
Hodisa hukumat tarkibidagi o‘zgarishlarga bag‘ishlangan anjuman chog‘ida yuz bergan.
Shvetsiya sog‘liqni saqlash vaziri Elizabet Lann jurnalistlar bilan bo‘lib o‘tgan matbuot anjumanida hushidan ketdi. Bu haqda mahalliy SVT telekanali xabar berdi. Hodisa hukumat tarkibidagi o‘zgarishlarga bag‘ishlangan anjuman chog‘ida yuz berdi.
Lann bosh vazir Ulf Kristersson, energetika va tadbirkorlik vaziri Ebba Bush hamda ijtimoiy masalalar vaziri Yakob Forsmed bilan birgalikda minbardan chiqish qilayotgan bo'lgan. Shu payt Elizabet Lann to‘satdan hushini yo‘qotib, minbardan yiqilib tushgan. Vazir tezda zaldan olib chiqilgan.
Bir necha daqiqadan keyin Elizabet Lann qaytib kelib, yig‘ilgan jurnalistlarga qondagi qand darajasi keskin tushib ketganini aytgan. Shunga qaramay, matbuot anjumani to‘xtatilib, keyinga qoldirilgan.
Ma’lum bo‘lishicha, Gyoteborg shahar kengashi a’zosi va “Xristian demokratlar” partiyasi vakili bo‘lgan Lann hushidan ketgan kuni sog‘liqni saqlash vaziri etib tayinlangan. U sobiq vazir Ako Ankarberg Yoxanssonning kutilmaganda iste’foga chiqishi ortidan lavozimga keldi.
