Toshkent shahrida atmosfera havosini muhofaza qilish choralari kuchaytirilmoqda
Ko‘rilgan chora-tadbirlar natijasida 4,7 ming tonna zararli tashlama atmosferaga chiqishining oldi olindi.
Joriy yilning yanvar–avgust oylarida Toshkent shahri havosini sog‘lomlashtirish va ifloslanish manbalarini bartaraf etish bo‘yicha keng ko‘lamli tadbirlar amalga oshirildi.
Vazirlar Mahkamasining 2025-yil 8-fevraldagi 59-F-son farmoyishi asosida poytaxtda 12 ta hududiy ishchi guruh tuzildi. Ularning tarkibiga vazirlik va idoralardan 150 nafardan ortiq mutaxassis jalb qilinib, sanoat korxonalari, issiqxonalar va boshqa obyektlarda ekologik talablarning bajarilishi muntazam nazoratga olindi.
O‘tgan davr mobaynida 1452 ta obyekt xatlovdan o‘tkazilib, 174 ta tungi reyd tashkil etildi. Natijada 281 ta qonun buzilish holati aniqlanib, 154 nafar shaxsga nisbatan ma’muriy bayonnoma tuzildi, 20 ta obyekt faoliyati vaqtincha to‘xtatish uchun sudga kiritildi. 179 ta qonunbuzarlik bartaraf etildi. Shuningdek, korxonalar tomonidan 11 ta zamonaviy qozon, 19 ta filtr va 12 ta chang tozalash uskunalari o‘rnatildi.
Ekologik barqarorlikni ta’minlash maqsadida “Yashil belbog‘” loyihasi doirasida yirik sanoat korxonalari hududida daraxt ekish ishlari boshlangan. 2025-yilda 200 ming tup daraxt va buta ekilishi belgilangan bo‘lib, bahor mavsumida 79 490 tup ko‘chat o‘tqazildi.
Bundan tashqari, “Toza havo” respublika oyligining birinchi bosqichi (10-aprel – 10-may) davomida 40 mingdan ortiq avtotransport vositasi tekshirilib, 586 ta mashinada me’yoridan ortiq chiqindi gaz chiqarilishi aniqlanib, kamchiliklar bartaraf etildi. Natijada 4,7 ming tonna zararli tashlamalarning atmosfera havosiga chiqarilishiga yo‘l qo‘yilmadi. Hozirda mazkur oylikning ikkinchi bosqichi (10-sentabr – 10-oktabr) Toshkent shahrida davom etmoqda.
Poytaxt havosini toza saqlash va ifloslanish manbalarini kamaytirishga qaratilgan tadbirlar izchil davom ettirilmoqda.
