Toshkent viloyatida “bola o‘g‘irlash” haqidagi xabarlar asossiz ekani aniqlandi
Hodisa bo‘yicha bola o‘zi yaqinlaridan cho‘chib noto‘g‘ri ma’lumot bergani aniqlandi.
Toshkent viloyati Yuqori Chirchiq tumanida tarqalgan “bola o‘g‘irlash” haqidagi video va xabarlar asossiz ekani aniqlandi.
Aniqlanishicha, 2012-yilda tug‘ilgan voyaga yetmagan E.H. 9-sentabr kuni yaqinlariga aytmasdan boshqa mahallada yashovchi do‘stining uyiga borgan. Oradan vaqt o‘tib qarindoshlari uni topgach, noqulay vaziyatdan chiqish uchun u “meni o‘g‘irlab ketishmoqchi bo‘lishdi”, degan. Ushbu gapni eshitgan yaqinlari esa ichki ishlar organlariga murojaat qilgan.
Tuman ichki ishlar bo‘limi tomonidan zudlik bilan olib borilgan o‘rganish natijasida hududda hech qanday bola o‘g‘irlash holati qayd etilmagani, voyaga yetmagan shaxs esa yolg‘on gapirganligi ma’lum bo‘ldi.
Profilaktika chorasi sifatida bola va uning qarindoshlari bilan tushuntirish ishlari olib borildi. Ularga bunday harakatlarning jiddiy huquqiy oqibatlarga olib kelishi haqida ma’lumot berildi.
