Isitish mavsumida ehtiyojmand oilalarga yordam puli beriladi

2025/2026 yilgi isitish mavsumida ehtiyojmand oilalarni qo‘llab-quvvatlash maqsadida noyabr oyida bir martalik moddiy yordam ajratiladi. Bu haqida Ijtimoiy himoya milliy agentligi xabar bermoqda.

 

Prezident qaroriga ko‘ra, 1 million so‘m miqdoridagi yordam quyidagi toifadagi oilalarga beriladi:

 

— “Ijtimoiy himoya yagona reyestri” orqali bolalar nafaqasi yoki moddiy yordam olayotgan oilalar;

— “Kambag‘al oilalar reyestri”ga kiritilgan oilalar;

— “Mahalla yettiligi” tomonidan tuzilgan qo‘shimcha ro‘yxatga kiritilgan oilalar.

 

Qo‘shimcha ro‘yxat shakllantirilayotganda quyidagilarga ustuvorlik beriladi:

 

— boquvchisini yo‘qotgan oilalar;

— tarkibida I yoki II guruh nogironi bor oilalar;

— nogironligi bo‘lgan bolani parvarishlayotgan oilalar;

— gaz taʼminoti mavjud bo‘lmagan yoki markazlashgan isitish tizimisiz ko‘p qavatli uyda yashovchi oilalar;

— bir xonadonda 3 va undan ortiq oila birga yashaydigan oilalar;

— uzoq muddatli davolanishni talab etuvchi og‘ir kasallikka chalingan shaxs yashaydigan oilalar;

— yolg‘iz keksalar va nogironligi bo‘lgan shaxslar yashaydigan oilalar.

 

Mazkur yordamni olish uchun ehtiyojmand oilalar joriy yilning 25 sentyabriga qadar “Mahalla yettiligi”ga murojaat qilishi kerak.