Samarqand va Jizzaxda xorijga yuborishni va’da qilgan firibgarlar fosh etildi
Firibgarlar fuqarolarga Slovakiya va AQShga ketishga yordam berishni va’da qilgan.
Bosh prokuratura huzuridagi Departamentning Samarqand va Jizzax viloyatlaridagi bo‘linmalari xodimlari Davlat xavfsizlik xizmati bilan hamkorlikda firibgarlikka qarshi navbatdagi tezkor tadbirlarni o‘tkazdi.
Samarqandda “AD” xususiy korxonasi rahbari ikki fuqaroning ishonchiga kirib, ularni Slovakiyaga ishga yuborishni va’da qilgan. Shu maqsadda 7 ming AQSh dollarini olayotgan paytda u qo‘lga olindi.
Jizzax viloyatida esa boshqa bir shaxs ikki fuqarodan Amerika Qo‘shma Shtatlariga sayohat vizasini rasmiylashtirib berishni va’da qilib, 2 ming AQSh dollarini olayotganda ushlangan.
Mazkur holatlar yuzasidan Jinoyat kodeksining tegishli moddalari asosida jinoyat ishi qo‘zg‘atildi. Tergov doirasida ushbu firibgarliklardan zarar ko‘rgan boshqa shaxslarni aniqlash bo‘yicha tezkor choralar ko‘rilmoqda.
