Surxondaryoda noqonuniy ekstremistik guruh faoliyati fosh etildi
DXX Zamon.uz’ga voqea tafsilotlarini ma'lum qildi.
Davlat xavfsizlik xizmati Surxondaryo viloyati bo‘yicha boshqarmasi tomonidan olib borilgan tezkor-qidiruv tadbirlari natijasida, O‘zbekiston Respublikasi Oliy sudi qaroriga muvofiq faoliyati taqiqlangan “Tavhid va jihod katibasi” terrorchilik tashkiloti tarafdorlaridan iborat noqonuniy guruh fosh qilindi.
Aniqlanishicha, ushbu guruh a’zolari diniy yig‘inlar niqobi ostida terrorchilik tashkilotlari mafkurachilarining materiallarini tinglab, Suriya davlatiga borib jangarilar safiga qo‘shilish, shuningdek, o‘zlarini portlatish orqali “shahid” bo‘lish masalalarini muhokama qilishgan.
Shuningdek, ular ijtimoiy tarmoqlar orqali xorijdagi terrorchilar bilan aloqa o‘rnatib, portlovchi moddalar va zaharli kimyoviy vositalarni tayyorlash bo‘yicha elektron qo‘llanmalar orqali sabotaj harakatlarini amalga oshirishni rejalashtirishgan.
Sud tekshiruvlari davomida jinoyat guruhining ayrim a’zolari ilgari ham ekstremistik faoliyat uchun javobgarlikka tortilgan bo‘lib, ularga nisbatan avvalgi jarayonlarda yengillik qo‘llanilgani ma’lum bo‘ldi.
Natijada, 20 nafar faol ishtirokchiga nisbatan jinoyat ishi qo‘zg‘atilib, ular Jinoyat kodeksining tegishli moddalari bo‘yicha aybli deb topildi va qilgan jinoyatlariga qarab 6 yildan 13 yilgacha ozodlikdan mahrum etildi. Guruhning ayrim a’zolariga esa insonparvarlik tamoyillari asosida yengillik berildi.
