TIV: O‘zbekiston Afg‘onistonga vertolyotlarni qaytarmaydi
Tashqi ishlar vazirligi O‘zbekiston Afg‘onistonga 57 ta vertolyot qaytarishi haqidagi xabarlarni rad etdi.
O‘zbekiston Tashqi ishlar vazirligi Afg‘onistonga harbiy vertolyotlar qaytarilishi haqidagi xabarlarni rad etdi.
TIV matbuot kotibi Ahror Burxonovning ta’kidlashicha, ayrim xorijiy OAVda tarqalgan “57 ta vertolyot O‘zbekistondan Kobulga jo‘natiladi” mazmunidagi ma’lumotlar haqiqatga to‘g‘ri kelmaydi. Unga ko‘ra, O‘zbekistonning mazkur masaladagi pozitsiyasi o‘zgarmagan va samolyot hamda vertolyotlar Afg‘onistonga topshirilishi rejalashtirilmagan.
Eslatib o‘tamiz, 2021-yil avgust oyida “Tolibon” Kobulni egallagach, 585 nafar afg‘on harbiy xizmatchilari bilan birga 22 ta samolyot va 24 ta vertolyot Surxondaryoga olib o‘tilgan edi. Mazkur texnikalar AQSH mablag‘i hisobidan xarid qilingan bo‘lib, vaqtincha Afg‘onistonning sobiq hukumati ixtiyorida bo‘lgan.
Avvalroq Afg‘oniston muvaqqat hukumati ularni qaytarish bo‘yicha bir necha bor chaqiriq bildirgan, biroq O‘zbekiston tomoni mazkur harbiy texnika AQSH mulki ekani va qaytarib berilishi mumkin emasligini rasman bildirgan edi.
