Xitoyda 14 soat davomida dars qilgan bola shifoxonaga yotqizildi
11 yoshli bola yozgi uy vazifasini bir kunda bajarishga uringan.
Xitoyning Xunan provinsiyasida 11 yoshli maktab o‘quvchisi uy vazifalarini ortiqcha darajada bajarishga urinishi oqibatida shifoxonaga yotqizildi.
26-avgust kuni Lyan Lyan ismli bola ertalab soat 8:00 dan kechki 22:00 gacha uzluksiz dars tayyorlash bilan shug‘ullangan. Bir necha soat o‘tgach, unda nafas qisilishi, bosh aylanishi, bosh og‘rig‘i va qo‘l-oyoqlarda karaxtlik belgilari kuzatildi. Ota-onasi uni darhol shifokorga olib bordi.
Shifokorlar o‘quvchiga giperventilyatsiya sindromidan kelib chiqqan nafas yo‘llari buzilishi tashxisini qo‘yishdi. Bolaga nafas olish niqobi taqilib, qisqa muddat ichida uning ahvoli yaxshilandi.
Mutaxassislarning ta’kidlashicha, bunday holat ko‘pincha hissiy zo‘riqish, ota-onalar bilan kelishmovchilik, imtihonoldi tashvish yoki uzoq vaqt telefon va gadjetlardan foydalanish bilan bog‘liq bo‘lishi mumkin.
Shifokorlarning ogohlantirishicha, giperventilyatsiya sindromi nafaqat nafas qisilishi va yurak urish tezligining oshishiga, balki og‘ir hollarda mushaklarning qattiqlashishi va hatto hayot uchun xavf tug‘dirishi mumkin.
Xuddi shu belgilar bilan avgust oyida viloyatdagi tez yordam bo‘limiga 30 dan ortiq o‘quvchi murojaat qilgani ma’lum qilindi. Bu boshqa oylarga nisbatan 10 barobar ko‘pdir.
