Jarima ballari tizimi sabab qoidabuzarliklar 58 foizga kamaydi
YHXX ma’lumotiga ko‘ra, tizim ishga tushganidan beri haydovchilar orasida intizom oshgan.
1 iyundan yo‘l harakati qoidalarini buzganlik uchun jarima ballari tizimi ishga tushirilganidan keyingi uch oyda 60 mingdan ortiq haydovchi ball olgan. Bu haqda Yo‘l harakati xavfsizligi xizmati ma’lum qildi.
Tahlillarga ko‘ra, haydovchilar orasida 5 ball to‘plaganlar 4 nafar, 4 ballgacha jamg‘arganlar 14 nafar, 3 ballga yetganlar 129 nafarni tashkil etdi. 2 ball olganlar soni qariyb 5 ming, 1 ballga tushganlar esa 64 mingga yaqin. Shu bilan birga, mamlakatdagi 9 million 325 mingdan ziyod haydovchi umuman jarima balli olmagani qayd etilgan.
Tizim joriy etilgandan beri qoidabuzarliklar keskin kamaygan. Iyun-avgust oylarida 167 mingta qoidabuzarlik aniqlangan bo‘lib, bu 2024 yilning shu davriga nisbatan (285 mingta) 58 foizga kam.
Shuningdek, haydovchi aybi bilan sodir etilgan yo‘l-transport hodisalari soni ham 36 foizga qisqargan. 2024 yilda 531 ta hodisa qayd etilgan bo‘lsa, joriy yilda bu ko‘rsatkich 338 tani tashkil etgan.
