O‘zini DXX, IIB va MB xodimi deb tanishtirgan shaxslar fuqaroni 170 ming dollarga chuv tushirdi
Buning ortidan fuqaro avtomashinasi va uyini sotib, qarzga kirgan.
Maʼlum bo‘lishicha, Oliy Majlisning Inson huquqlari bo‘yicha vakiliga fuqaro M.P. o‘zining ehtiyotsizligi va soddaligi oqibatida katta miqdordagi mablag‘dan mahrum bo‘lgani yuzasidan murojaat qilgan.
Fuqaro M.P. o‘z murojaatida, 2024 yil dekabr oyida o‘zini Ichki ishlar, Davlat xavfsizlik xizmati va Markaziy bank xodimi deb tanishtirgan shaxslar taʼsirida kriptovalyuta orqali 170 000 AQSH dollarini o‘tkazib yuborganini bildirgan. Shu maqsadda u avtomashinasi va uyini sotgan, jamg‘armalarini yo‘qotgan, hatto qarzga kirgan.
Fuqaro M.P. 2024 yil dekabrida Kiberxavfsizlik markaziga rasmiy tarzda murojaat qilib, jinoiy ish qo‘zg‘atilgan va u jabrlanuvchi sifatida tan olingan.
Ombudsman shikoyatda ko‘rsatilgan vajlarga aniqlik kiritish maqsadida Ichki ishlar vazirligiga murojaat qilgan.
Murojaat hamkorlikda o‘rganilishi natijasida Kiberxavfsizlik boshqarmasi tomonidan Kriptodo‘kondan fuqaro M.P. foydasiga 115 ming AQSH dollari (1 mlrd 434 mln 625 ming so‘m) undirib berilgan.
“Ombudsmanga firibgarlik bilan bog‘liq ko‘plab murojaatlar kelib tushadi, ammo ularning katta qismida mablag‘larni qaytarish imkoni bo‘lmaydi. Bu esa bunday holatlarga aldanmaslik va oldindan ogoh bo‘lishni taqozo etadi”, deyiladi xabarda.
