Shavkat Mirziyoyev Xorazmdagi islohotlar samaradorligi bilan tanishdi
So‘nggi yillarda viloyatga 2 milliard dollar sarmoya kiritilib, 25 mingdan ortiq korxona ishga tushirildi.
Davlat rahbariga Xorazm viloyatida amalga oshirilayotgan islohotlar samaradorligi, mavjud imkoniyatlardan foydalanish hamda yangi tashabbuslar yuzasidan batafsil ma’lumot berildi.
So‘nggi yillarda tabiiy resurslari cheklangan ushbu hudud iqtisodiyoti tarkibiy o‘zgarishlar orqali barqaror rivojlanib bormoqda. Sakkiz yil davomida viloyatga 2 milliard AQSh dollari miqdorida investitsiya jalb etilib, 25 mingdan ortiq sanoat korxonasi tashkil etildi. Natijada ishlab chiqarish hajmi qariyb 2,2 barobar oshdi.
Hududda to‘qimachilik, avtomobilsozlik, elektrotexnika, oziq-ovqat va qurilish materiallari sanoati faol rivojlanmoqda. Suv resurslarini samarali boshqarish doirasida Toshsoqa magistral kanali qayta tiklandi, Amudaryo ustida qurilgan yangi ko‘prik esa aholi uchun muhim transport qulayliklarini yaratdi.
So‘nggi yillarda 660 ta ko‘p qavatli uy-joy qurilib, 21 ming oila yangi turar-joyga ko‘chib o‘tdi. 4,7 ming kilometr ichimlik suvi va 206 kilometr kanalizatsiya tarmoqlari barpo etilib, 580 ming aholiga birinchi marta markazlashgan ichimlik suvi yetkazildi. 2025-yil boshidan buyon 100 ming ehtiyojmand fuqaroga ish o‘rinlari yaratildi, kambag‘allik darajasi esa 12 foizdan 6,8 foizgacha qisqardi.
Yangi bosqichda “Islohotlar shtabi” faoliyatini yo‘lga qo‘yish orqali tadbirkorlik tashabbuslarini keng qo‘llab-quvvatlash rejalashtirilmoqda. Jumladan, Janubiy Koreya, Avstraliya va Slovakiya kompaniyalari ishtirokida umumiy qiymati 1 milliarddan ortiq dollar bo‘lgan yirik sanoat va energetika loyihalari taqdim etildi.
Umuman olganda, Xorazm viloyati bo‘yicha qiymati 2,4 milliard dollardan ortiq yangi investitsiya loyihalari shakllantirilgan bo‘lib, qo‘shimcha ravishda 86 million dollarlik istiqbolli tashabbuslar ishlab chiqilgan.
Davlat rahbari investorlarga zarur qulayliklar yaratish, loyihalarni tezkor amalga oshirish va sanoat zonalaridan to‘liq foydalanish yuzasidan topshiriqlar berdi. Shuningdek, yashirin iqtisodiyot ulushini qisqartirish va tadbirkorlikni rivojlantirish masalalari ham muhokama qilindi.
