Toshkent issiqlik elektr markazida mazutdan umuman foydalanilmaydi
Aholi uchun energiya ishlab chiqarishda faqat gaz-turbinalar qo‘llaniladi.
Toshkent issiqlik elektr markazida endilikda mazut yoqilg‘isidan umuman foydalanilmaydi. Bu yerda elektr va issiqlik energiyasi faqat tabiiy gaz asosida ishlaydigan zamonaviy qurilmalar yordamida ishlab chiqarilmoqda.
Davlat rahbarining tashabbusi bilan 2024-yilda markazda umumiy quvvati 64 MVt bo‘lgan yangi gaz-turbinalari ishga tushirilgan. Ushbu qurilmalar orqali yiliga 515 mln kVt⋅soat elektr va 630 Gkal issiqlik energiyasi poytaxt aholisi hamda iqtisodiyoti ehtiyojlari uchun ishlab chiqarilmoqda.
Ekologik xavfsizlik ham markaz e’tiborida. Hududda joylashgan 3 ta zamonaviy gaz-turbinali qurilmaga ekopostlar o‘rnatilib, atmosferaga chiqarilayotgan gazlar doimiy ravishda monitoring markazi tomonidan kuzatilib, tahlil qilinmoqda. Shuningdek, “Issiqlik elektr stansiyalari” AJ va Turkiyaning “Iltekno” kompaniyasi hamkorligida Chilonzor, Olmazor va Sergeli tumanlarida kogeneratsiya markazlari qurilib, ularda ham so‘nggi texnologiyalar asosida ekologik xavfsiz energiya ishlab chiqarish yo‘lga qo‘yildi.
Kelgusida Mirzo Ulug‘bek, Yunsobod, Shayxontohur, Uchtepa, Mirobod, Yashnobod va Yangihayot tumanlarida ham xuddi shunday qurilmalar barpo etilishi rejalashtirilgan. Shu bilan birga, markaz shahar ekologiyasini yaxshilashga hissa qo‘shmoqda: faqatgina 2025-yilda “Yashil makon” umummilliy dasturi doirasida 5 ming tup manzarali daraxt ekildi.
