Toshkentda “Dok-1 Max” va boshqa xavfli dorilar yo‘q qilinmoqda
Majburiy ijro byurosi xodimlari 68 bolaning o‘limiga sabab bo‘lgan “Dok-1 Max” va boshqa preparatlarni butunlay muomaladan chiqarishga kirishdi.
Toshkent shahrida sog‘liqni saqlash tizimida katta fojiaga sabab bo‘lgan “Dok-1 Max” siropi va boshqa xavfli preparatlarni butunlay muomaladan chiqarish jarayoni boshlandi. Ushbu ish Majburiy ijro byurosi xodimlari tomonidan amalga oshirilmoqda.
Omborlarda saqlanib qolgan jami 3,3 million dona dori vositasi, jumladan, 101 mingdan ortiq “Dok-1 Max” siropi va 56 ming dona “Ambronol” siropi, shuningdek millionlab tabletkalar maxsus pechlarda yoqib yuboriladi. Mutaxassislar nazorati ostida olib borilayotgan bu jarayon ekologiya va atrof-muhitga zarar yetkazmaslik talablariga qat’iy rioya etgan holda amalga oshirilmoqda.
Ma’lumki, ushbu dori vositalari tarkibida zaharli modda — etilen glikol aniqlangani sababli O‘zbekistonda 68 nafar bola halok bo‘lib, yana bir qator bolalar sog‘lig‘idan ayrilgan edi. Tekshiruvlar jarayonida preparatlar standartlashtirish bosqichida jiddiy qonunbuzarliklar orqali sertifikatlanganligi va korrupsion omillar sababli bozorga chiqarib yuborilgani fosh etilgan.
Sud qaroriga asosan 23 nafar shaxs javobgarlikka tortildi. Ulardan “Quramax Medical” kompaniyasi rahbari Singx Ragvendra Pratap 20 yilga, Farmatsevtika agentligi va Dori vositalarini ekspertiza markazining sobiq rahbarlari hamda boshqa mansabdor shaxslar 16–18 yilgacha ozodlikdan mahrum etildi.
Jabrlangan oilalarga jami 75,6 milliard so‘m miqdorida ma’naviy zarar undirildi. Xususan, halok bo‘lgan 68 nafar bolaning oila a’zolariga va og‘ir tan jarohati olgan bolalarning qonuniy vakillariga individual tovon pullari ajratilishi belgilandi.
Ushbu chora-tadbirlar kelajakda bunday fojiaga mutlaqo yo‘l qo‘ymaslik, farmatsevtika sohasida xavfsizlik va javobgarlikni kuchaytirishga qaratilgan.
